ओंवाळूं आरती मदनगोपाळा ॥ ...
ओंवाळूं आरती मदनगोपाळा ॥
श्यामसुंदर गळा वैजयंतीमाळा ॥ धृ. ॥
चरणकमल ज्याचें अति सुकुमार ॥
ध्वजव्रजांकुश ब्रीदाते तोडर ॥ १ ॥
नाभिकमलीं ज्याचें ब्रह्मयाचे स्थान ।
ह्रुदयी पदक शोभे श्रीवत्सलांछन ॥ २ ॥
मुखकमल पाहातां सूर्याच्याकोटी ॥
मोहियेलें मानस कोंदियली दृष्टी ॥ ३ ॥
जडितमुगुट ज्याच्या दैदीप्यमान ।
तेणें तेजें कोंदलें अवघे त्रिभुवन ॥ ४ ॥
एका जनार्दनीं देखियेले रुप ॥
रुप पाहों जाता झालेसें तद्रूप॥ ५ ॥